Haur hezkuntzako zubi lana indartuz, etapa honetako eskaintza  pedagogikoa sendotzeko lanketa egiten ari gara.

Etapa honetan konpetentzien garapenean oinarritzen gara.

Arloetako jakintzak lantzeaz haratago, jakintza horiek bizitzako esparru eta egoera guztietan –esparru eta egoera pertsonal, sozial, akademiko eta lanekoetan– eraginkortasunez aplikatzeko egoerak planteatzen zaizkie ikasleei. Horrela, jakintzak modu testuinguratuan bereganatzeko, ikaskuntza arazo edota proiektuetan oinarritzen dugu.  

Metodologia aktiboek presentzia dute etapa honetan, hala nola, metodologia kooperatiboa eta proiektuetan oinarritutakoa. 

Etaparen lehen urteetan irakaste espliziturako denborak eskaintzeaz gain, esaterako, irakurketa eta idazketa gidatzeko, matematikarako…, mikroespazioetan eta zirkulazio librean aritzeko tarteak izaten dituzte ikasleek; konpetentzia espezifikoekin lotura duten espazioak dira, esperimentatzeko, norbere nahien eta interesen araberako erabakiak hartzeko, autonomia eta ikaskidetza lantzeko, mugimendua ahalbideratzeko eta abar.

Etapan gora, Ikastolen Elkarteak sorturiko EKI proiektua lantzen dugu. Euskal curriculumean, konpetentzietan eta integrazioaren pedagogian oinarritutako proiektua da. Jakintzak eskuratzeaz gain,  landutako jakintzak bizitzako egoera anitz eta errealetan erabiltzen eta, bakarka nahiz talde lanetan,  irtenbideak aurkitzen ikasten laguntzen diegu ikasleei. 

Konpetentzia digitala ia ikas arlo guztietatik bideratzen dugu. IKTak ikas arlo gehienetan txertatuta ditugu eta, beraz, ikaskuntza irakaskuntza prozesuan, ikasgelako eguneroko jardueretan,  baliabide digitalen erabilera integratuta daukagu.