Euskalduna, mundura irekia
Ikastolan euskaraz hezi eta bizi gara eta euskaraz bizi nahi dugu gure herrian. Euskaratik eta euskal kulturatik, gainontzeko kultura nahiz hizkuntzei irekia. Euskaran ardazturiko eleaniztasunarekin. Euskal curriculuma oinarri.
Euskal Herrikoa
Euskal Herria bere osotasunean ulertzen eta lantzen dugu. Muga administratiboez gaindi, Euskal Herri osoan hezkuntza euskalduna eta eredu propioa eskaintzen duten hezkuntza-erakunde bakarrenetakoak gara Euskal Herriko Ikastolen Elkarteko (EHI) ikastolak.
EHIko ikastola guztiok parte hartzen dugun Elkartasun Kutxaren bidez, beharra duten ikastolak zein proiektuak laguntzen ditugu, besteak beste, Nafarroako eta Ipar Euskal Herriko ikastolak, zonalde horiek euskalduntzeko ezinbesteko tresnak.
Herrian sustraitua
Herri onurarako kooperatiba da gure ikastola, irabazi asmorik gabekoa. Amasa-Villabonako eta Zizurkilgo herriei eta herritarrei hezkuntza zerbitzu publikoa eskaintzen diegu.
Heztea, ordea, ikastola eta familiaren betebeharra izateaz gain, herri oso baten ardura ere badela sinisten dugu. Horregatik, Amasa-Villabonako eta Zizurkilgo eragile desberdinekin elkarlanerako konpromisoa dugu.
Denon artean egina! Denontzat eta denona!
Herritar guztiek dute tokia gure ikastolan. Aukera berdinekin gaitasun, jatorri, sinismen edo edozein desberdintasun tarteko delarik ere. Kohesio eta elkarbizitza positiboa oinarri izanik, ikastola inklusibo eta demokratikoaren alde egiten dugu.
Elkarrekin bidea eginez, elkarri entzunez, denon artean, denontzat den ikastola.
Berritzailea
Ikastolako eskaintza pedagogikoa hausnartzen, garatzen eta berritzen ari gara ikastolan. Espazioak berritzen, proiektu berriak txertatzen, pertsonen garapen integrala ahalbideratuko duen kalitatezko hezkuntza garatzeko lanean dihardugu. Hezkuntza eraldatzen, gizartea eraldatzeko; gizarte justuago, parekideago, euskaldunago eta zoriontsuago bat eraikitzeko.
Ikaslearen garapenean bidelagun
Gure ikasleak herritar euskaldunak, eleanitzak, kritikoak, anitzak, aktiboak, solidarioak, autonomoak, konpetenteak eta osasuntsuak izan daitezen lan egiten dugu. 0-16 urte bitarteko gazteei bitartekoak eta laguntza eskaintzen diegu eta prozesu horretan bidelagun gaituzte ikasle eta familiek.
