Urtero bezala, ZUBIMUSU Ikastolako LH6ko ikasleek azoka solidarioa egingo dute eta bihar, osteguna, martxoak 23 izango da horretarako eguna.
Txerminen, ikastolan bertan izango da hitzordua eta ikasle, irakasle eta familia guztiak bertaratzera gonbidatu nahi ditugu.
Txermingo eraikinaren kanpo espazioan ospatuko dugu azoka. Bertan, etxetik ekarritako gauzak jarriko dira salgai (behar ez dituzten gauzak) eta ateratako dirua GKE bati emango diogu.
Iaz Aspanogiri eman zitzaion diru eta arrakasta izan zuen ekimenak.
Azoka prestatu bitartean, gainera, gai bat lantzen dute eskolan eta aurten Senegal eta Euskal Herriko bizi maila aztertu eta alderatu dituzte.
Non jaio, hala bizi du izena proiektuak. Hala, herrialde bakoitzean nolako bizi baldintzak dauden eta horiek herritarrengan zein eragin duten ikusi dute. Irakasgai ezberdinetan landu dute gaia eta borobiltzeko azoka prestatu dute.
