Berriak

2020.01.08

Zubimusuko jangela kudeatzen duen Askora enpresak ostegunean bilduko ditu berriz ikasleak Mahi-Mahi piraten itsasontzian. Baina, lehen hiruhilekoan egin dituzten ekintzen laburpena ikusi nahi? Hasiera paregabea izan da, mila ekintza, gai-lanketa, hausnarketez… betea! Hementxe duzue laburpena: #1Hiruhilekoa

2020.01.08

1-3 urteko haurren gurasoei eta interesa duen edonori zuzenduta, datorren urtarrilaren 18an, Zizurkilgo ikastolan,  Estitxu Fernandez psikologoak hitzaldia eskainiko du "1-3 urteko haurra ezagutzen" izenburupean. Adin tarte honetako haurraren garapena (garapen emozionala, autonomia ...) izango du hizketagai. 10:00etatik 12:00etara izango da hitzaldia. Interesa duzuenok izena eman behar duzue aurretik, ikastolako idazkaritzan (943 692 321) edota webguneko formularioa beteta.

2019.12.10

“Gure seme alabek behar duten motxila” izenburupean hitzaldia egingo du Javier Bahón adituak astelehenean. 17:30ean izango da, Gurea zineman. Tuinnovas hezkuntzako berrikuntza eta coaching laborategiko burua eta nazioarteko hezkuntza metodologien dibulgatzailea da Bahón. XXI. mendeko herritarra izateak aurreko belaunaldietan behar ez ziren konpetentzia eta gaitasun batzuen garapena eskatzen du. Horregatik, familiek behin eta berriz entzuten badute ere gaur egun gazteek mundu ezezagun baterako prestatu behar dutela, ez dute ondo ulertzen zer esan nahi duen horrek. Hori guztia hobeto ulertzen lagunduko du Bahón-ek.  

2019.12.03

Ikastolek berezko duten identitateren zeinuetako bat da elkartasuna, eta horren adibide da Elkartasun Kutxa. Proiektu horren barruan, Elkartasun Ikastolen Batzar Nagusiak 840.000 euroko laguntzak banatuko ditu 2020.urtean hamar ikastolaren artean. Zubimusu ikastola ere Elkartasun Ikastolen elkarteko kidea da.

2019.11.28

Ikasleen zentzumenak martxan jarri ditu hilabete honetan zehar Mahi-Mahik Zubimusun. Elikagai ezberdinak ukitu, sentitu, eta dastatzeko aukera izan dute ikasleek, dastamena zer den ezagutuz eta dastamenean mingainak duen garrantziaz jabetuz. Horrez gain, Go!azen telesailak ere izan du bere tartetxoa Mahi-Mahiren proiektuen eta ekintzen artean. Ikusi bi proiektuetako argazkiak.

2019.11.25

“Emakumeenganako indarkeriaren aurkako Nazioarteko Eguna”-ren harira, ekitaldia egin dugu Villabonako plazan, herriko beste hainbat eragilerekin batera, hezkidetzaren eta feminismoaren bidetik indarkeria matxista salatu eta indarkeria mota guztiei aurre egiteko.

2019.11.06

Ikasleen artean euskaraz bizitzeko gogoa eta ilusioa sustatzeko abenduaren 3an egingo den Euskararen Nazioarteko Egunaren harira, Euskaraz bizi nahi dut lelodun elastikoa edo kamiseta erostera gonbidatzen zaituztegu. Aurten ikastetxeentzat egin duten ale berezia kolore urdineko kamiseta izango da. Hala ere, gogorarazten dizuegu www.euskarazbizinahidut.eus/denda atalean ikusgai dituzuela beste hainbat produktu. Baita ere, gogorarazi ikastola bidez egin dezakezuela produktu horien eskaera, idazkaritzara deituta (943692321) edo zubimusu@ikastola.eus helbidera mezua bidalita. Eskaerak egiteko azken eguna azaroaren 11 izango da.

2019.11.06

Aurten ere Errigorako saskiak erosiz Nafarroa hegoaldeko euskalgintzari laguntzeko aukera dugu! Zazpigarren edizio hau berrikuntzekin dator, 3 lote ezberdin jarri baitira aukeran: beltza, berdea eta zuria. Hurrenez hurren, saski bakoitzak 50€, 60€ eta 70€ balio dute. Saski bakoitzaren prezioaren %25 Nafarroako hegoaldeko euskalgintzari laguntzeko erabiliko da. Aurten, besteak beste, zonalde horretako euskaldunak, euskaltzaleak eta eragileak saretzea helburu duen "Agerraldia" egitasmoa martxan jartzeko erabiliko da. Sasiak eskatzeko epea azaroaren 20an amaituko da. Helbide honetan bete dezakezue saskien eskaera orria: Errigora saskiak.

Orriak