Berriak

2020.11.18

Covid 19-aren eraginak gutxitze aldera Zubimusu Ikastolan landu eta garatu ditugun protokoloen artean ikasleekin aire libreko irteerak egingo ditugu. Hala, hilabetean behin eta ostiralez, LH-ko maila guztietako ikasleekin gure inguruko parke edo gune berde batera goiz pasako irteerak eta ibilbideak egiten hasi gara. Irteera zein ostiraletan izango den aurrez jakinaraziko da, eguraldiaren arabera, eta ikasle bakoitzak arropa egokia eta hamaiketakoa eramateko motxila ekarri beharko ditu egun horretan. Ikusi hilabete honetan egindako irteerako argazkiak.

2020.11.10

Zubimusu Ikastolak bat egin du Euskaraldiaren bigarren saiorekin, eta hala, Belarriprest edo Ahobizi roletatik aritzeko izena eman ahal izateko mahaia jarriko da ostiralean Txerminen, 17:00etatik 18:00etara. Euskaraldian parte hartu ahal izateko izen emate orriak izango ditugu bertan, eta baita Belarriprest eta Ahobizi txapak ere. Nahi dutenek Euskaraldiko banderolak erosteko aukera ere izango dute, 5 euro ordainduta. Egin dezagun euskara gehiago, gehiagorekin eta gehiagotan! Animatu eta eman izen Euskaraldian!

2020.11.10

Herritarren aktibazioari eta erakundeen erantzukizunari dei egin diete euskalgintzako hainbat eragilek. Pandemiaren lehen olatuak agerian utzitako hutsune eta desberdinkeriak bizi-bizi daudela iritsi da bigarrena. Eta oraingoan ere estu hartu ditu euskara eta euskalgintza, lehendik zetozen gabeziak gordindu besterik ez dituelako egin. Hala salatu dute Kontseiluak, Topaguneak, Durangoko Azokak, Errigorak, AEK-k eta Ikastolen Elkarteak euskalgintzaren ordezkaritza zabal baten izenean egindako agerraldian. Jarraitu irakurtzen.

2020.11.05

Ama lurra zainduz eta landuz, trukean beti jasotzen da eta guk jaso ditugu hainbeste mimoz egindako lanaren fruituak! Altxor paregabea da baratza!

2020.10.30

Gau beltzaren harira lanketa egin dute gaur Zubimusuko ikasleek. Kalabazak hustu dituzte eta arimen gauerako prestatu; gaztainak ere jan dituzte eta mozorrotu ere egin dira. Ikusi argazkiak.

2020.10.29

Garai bateko euskal usadioa berreskuratu nahian, herri mailan Gau Belltza eguna ospatu nahi izan da, baina egoera hau dela eta ,bertan behera geratu da. Dena den, haur hezkuntzakook bat egin nahi izan dugu ekimenarekin eta horregatik, kalabazak erostera herriko Pepi dendara joan gara. Ikusi nahi al duzue kalabaza hauekin zer egingo dugun? Etorri, etorri larunbat iluntzean eta ea denon artean arimak uxatzen ditugun! Argazkiak ikusi.

2020.10.28

Aste honetan Eusko Jaurlaritzak ezarri dituen arauen aurrean, azaroaren 13an Donostiako Kursaal-ean egingo den ‘Ikastolak Herriari’ ikuskizunarekin aurrera jarraitzea erabaki du Euskal Herriko Ikastolen Elkarteak. Baina neurrien ondorioz, eta aurrez iragarri zen ordu aldaketaz gain, beste hainbat aldaketa ere egin behar izan dira. Hala, mugikortasun arauei jarraiki, ikuskizunera Donostiako bizilagunek zein mugakide diren herrietako biztanleek bakarrik joan ahal izango dute. Hala, sarrera erosita zuten Gipuzkoako zein gainerako herrialdeetako kideek sarrera itzuli beharko dute, erosi zuten bide berdina erabiliz. Sarreren dirua itzuli egingo da. Jarraitu irakurtzen.

2020.10.27

Aurten ere Errigorako saskiak erosiz Nafarroa hegoaldeko euskalgintzari laguntzeko aukera dugu!. Zortzigarren edizio honetan ere berrikuntzak ditugu, aurreko urtean bezala 3 lote ezberdin jarri dira aukeran (beltza, berdea eta zuria), saskiek 50€, 60€ eta 70€ balio dute hurrenez hurren. Aurten, saskiez gain, Korrikaren katilua, Seaskaren egutegia edota D ereduaren haziak erosteko aukera izango dugu, bakoitza 5 euroan. Jarraitu irakurtzen.

Orriak